ក្លឹបស្តេចស Real Madrid បានចូលរួមជាមួយក្លឹបបិសាចក្រហម Manchester United ប្រជែងគ្នាចង់ទិញយកតារាឆ្នើម Neymar របស់ក្លឹប FC Barcelona ក្រោយចប់រដូវកាលនេះ។ នេះបើតាមសេចក្តីរាយការណ៍ពីអេស្ប៉ាញ។
សារព័ត៌មាន Diario Gol បានឲ្យដឹងថា Man Utd ចាប់អារម្មណ៍ Neymar ខ្លាំង ដោយពួកគេគ្រោងនឹងហ៊ានចំណាយលុយទិញផ្តាច់កុងត្រាដល់ទៅ ១៧៣លានផោនទៀតផង។ ប៉ុន្តែពេលនេះលោក Florentino Perez ប្រធានក្លឹប Real ក៏ចង់បានកីឡាករជម្រើសជាតិប្រេស៊ីលរូបនេះដែរ ហើយលោកជឿថា Neymar អាចនឹងចេញពី Barca។
កីឡាករវ័យ២៥ឆ្នាំ ហាក់កាន់តែអស់សង្ឃឹមជួយឲ្យ Barcelona អាចឈ្នះពាន La Liga រដូវកាលនេះ ខណៈដែលកាលចុងសប្តាហ៍កន្លងទៅ ក៏ទទួលពិន័យកាតក្រហមពេលប៉ះ Malaga ថែមទៀត។ រីឯអ្នកចាត់ការ Luis Enrique នឹងចាកចេញពីតំណែងក្រោយចប់រដូវកាលនេះ និងនៅមិនទាន់ស្វែងរកអ្នកឡើងជំនួសនៅឡើយទេ ដូច្នេះការដោះដូរអ្នកចាត់ការ ក៏ជាកត្តាធ្វើឲ្យ Neymar អាចចាកចេញ។
ម៉្យាងវិញទៀត ទោះបីរូបគេ និង Lionel Messi បង្ហាញជាសាធារណៈថាមិត្តភ័ក្តិ ប៉ុន្តែការប្រជែងគ្នាយកតំណែងតារាឆ្នើមលេខ១ របស់ក្រុម គឺពិបាកប្រជែងជាមួយប្រធានក្រុមជម្រើសជាតិអាហ្សង់ទីនណាស់។ ដូច្នេះចំណុចនេះ ក៏អាចនឹងធ្វើឲ្យ Neymar ពិចារណា ចង់ចេញពី Barca ទៅ Man Utd ឬ Real Madrid រដូវកាលក្រោយផងដែរ៕
No comments:
Post a Comment